போர்டிங் ஸ்டேஷனில் ஏறாவிட்டால் இனி டிக்கெட் ரத்தாகும்ரயில்வே புதிய விதிமுறை அமலுக்கு வந்தது
பயணி தனது டிக்கெட்டில் குறிப்பிட்டுள்ள போர்டிங் ஸ்டேஷனில் இருந்து ரயிலில் ஏறத் தவறினால், அவரது இருக்கை உடனடியாக காலியாக இருப்பதாக அறிவிக்கப்பட்டு, காத்திருப்போர் பட்டியலில் உள்ள பயணிகளுக்கு ஒதுக்கப்படும் முறை ரயில்வேயில் அமலுக்கு வந்துள்ளது.
ரயில் பயணிகளின் வசதிக்காகவும், காலியாக உள்ள இருக்கைகளை உடனுக்குடன் காத்திருப்போர் பட்டியலில் உள்ளவர்களுக்கு ஒதுக்கவும் இந்திய ரயில்வே அதிரடி மாற்றத்தைக் கொண்டு வந்துள்ளது. அதன்படி, முன்பதிவு செய்த பயணி தனது டிக்கெட்டில் குறிப்பிட்டுள்ள தொடக்க நிலையத்தில் ரயிலில் ஏறத் தவறினால், அந்த டிக்கெட் தானாகவே ரத்து செய்யப்பட்டு, இருக்கை வேறு ஒருவருக்கு ஒதுக்கப்படும்.
பழைய விதிமுறை vs புதிய விதிமுறை:
* முன்பு: ஒரு பயணி வராத பட்சத்தில் அடுத்த இரண்டு ரயில் நிலையங்கள் அல்லது ஒரு மணி நேரம் வரை டிக்கெட் பரிசோதகர் காத்திருக்க வேண்டியிருந்தது.
* தற்போது: அனைத்து ரயில்களிலும் ஹேண்ட் ஹெல்டு டெர்மினல் (HHT) எனப்படும் கையடக்க கணினி கருவிகள் பயன்பாட்டிற்கு வந்துள்ளதால், பயணி வரவில்லை என்பதை டிடிஇ (TTE) உடனடியாக திட்டத்தில் பதிவேற்றுவார். இதனால் அந்த இருக்கை அடுத்த சில நிமிடங்களிலேயே காத்திருப்போர் பட்டியலில் உள்ளவருக்கு ஆன்லைன் மூலம் வழங்கப்பட்டுவிடும்.
முக்கிய குறிப்புகள்:
* பயணி வராத காரணத்தால் இருக்கை ரத்து செய்யப்பட்டவுடன், சம்பந்தப்பட்ட நபரின் பதிவு செய்யப்பட்ட மொபைல் எண்ணிற்கு இது குறித்த குறுஞ்செய்தி அனுப்பப்படும்.
* ரயிலில் ஏறாத பயணிக்கு டிக்கெட் கட்டணம் திரும்ப வழங்கப்பட மாட்டாது என்பதும் குறிப்பிடத்தக்கது.
பயணிகள் கவனத்திற்கு:
பயணிகள் ஒருவேளை தாங்கள் முன்பதிவு செய்த ஸ்டேஷனுக்குப் பதிலாக வேறு ஸ்டேஷனில் ஏற விரும்பினால், ரயில் புறப்படுவதற்கு 24 மணி நேரத்திற்கு முன்பே ஆன்லைன் மூலமாகவோ அல்லது கவுண்ட்டர்களிலோ தங்களது போர்டிங் பாயிண்ட்டை (Boarding Point) மாற்றிக்கொள்ள வேண்டும் என ரயில்வே நிர்வாகம் அறிவுறுத்தியுள்ளது.
இந்த புதிய நடைமுறையினால் இனி ரயில்களில் காலியாக இருக்கும் இருக்கைகள் தகுதியுள்ள பயணிகளுக்கு வெளிப்படையான முறையில் உடனடியாக கிடைக்கும் என எதிர்பார்க்கப்படுகிறது.
